a45.1-5Har 6.28—11.10, 20.1-21
b45.6Har 4.14
c45.7-13Har 28.1-43
d45.15LBM 8.1-36
e45.18-19Dag 16.1-35
f45.22Dag 18.20, Man 12.12
g45.23-26Dag 25.7-13
Sir 45
Mosese henego ogo
1Anduane Homogohanda agali mbira Yagaba hameigini heago aria dabo heleagola wali agalime ibu gubalini ho hene. Ibu Ngode Datagaliwabe nenege halu wali agalibi nenege dege henego ibu mini Mosese hene. Iname turu howa ibu mitangi ho holene nga. a 2Anduane Homogohanda ibunaga mini timbuniore mini lene dahuliyaliru mini lene heledagobi dege helene. Ani helowa mo hongo ho heleagola waitigi bu hearume ibu hondowa gi timbuni hene. 3Mosese ibugua agalime nabiagane ale dewa ibunaga neha mbuha howa bilo Anduane Homogohanda mo bia hayagola hongo timbuni ogoni kini bu hearunaga deni howa mo ya hene. Anduane Homogohanda Mosese ibu wali agali haru hagane helo dabo helalu Mosesehanda ibunaga dengui hendelo mo walia halu bini. 4Mosese ibu bi hale haga howa ibuni mo dindiha ho haga howa mana tigabi ngago bialu haga heago hondowa Anduane Homogohanda ibu wali agali bu hearuha ibu agali ho bamba hene helo helene. 5Anduane Homogo ibuni Mosesela bi laedene bialu hari beraliba arumahe wiagoha haru anda pene. Ani bialu Anduane Homogohanda ibuni dengui Mosese mo walia howa ibunaga bi mana Mosese giha mo ya hene. Bi mana urunime agali holene mialu mini gigabi wulene miaga mini. Anduane Homogohanda Yagaba hameigini bu hearu ibunaga habo nalolene bi ngago lawai holenaga mini. Isaraele wali agaliru ibunaga bi mana lawai holenaga mini.Arono henego ogo
6Libai hameigini aria agali mbira Anduane Homogohanda Mosese hamene Arono dabo helene. b 7Anduane Homogohanda ibula habo nalolene bi lo wialu ibugua wali agalinaga loma bu mirago mo loma bu mule loma binigo mo miaga agali hene. Ani helowa Anduane Homogohanda labolabo bayaleore wiarume mo yari bia halu labolabo luni biagimbu biaga yolo dewaoreme mulene wiago mo karula halu bini. c 8Anduane Homogohanda ibu yari baya taraore wiarume mo karula halu agali loma binigo mo miaganaga aga tara tararu mo karula halu bini.Yari uruni agalinaga aga giha karulolene mbirabi mende karula gimbu bulenebi wabu mini. 9Labolabo luni ogoni yari taraore ira taranaga lini baya dedaligobirume mo yari bia helowa mo karula hene. Ani bialu ngilinge̱lo̱ lolene emeneru ibu poragola ngilinge̱lo̱ lelonaga helene. Anduane Homogohanda ogoni ngilinge̱lo̱ larago hale howa ibunaga andaha wali agali bedaru mitangi bilonaga helene. 10Agali aga wabiaga manda bi bu hearume aga loma binigo mo miaga tinaga karulolene ogoni ngolomebi pu daramabi mindibirume mo yaribia halu buwa wabini. Agali mandabi maru hearume ege to̱le̱ kira Anduane Homogonaga hame ngago hale hole badaga haga mini Urimu Tumimula wiago honolene nu baya mbira wabini. Tigua nu ogoni pu daramabime lebini. 11Agali maru ngolome biabe biaga hearume nu biago ege to̱le̱ baya tara tara wiarume mo yaribia halu lebu para haga bini. Tigua ege to̱le̱ uruni podaga bialu ha helaga bialu Isaraele hameigini homberiali (12) hearunaga mini ege to̱le̱ ogoriani gilibu wiai hene. 12Ani bialu agali mbira mbirale wabulene mandabi heagome Arononaga labolabo tangi hanaga wiago karula dambi holene mabubi mbira ngalome wabini. Ani buwa mabubi ngolome wabini ogoriani bi mbira gilibu winigo ogodagua, Anduane Homogonaga Loma Biaho Nga, lalu ogoni ibu mo yári bia hene baya taraore mbira deme hondolene baya nga. 13Arono ibu naheha yári baya urunibi mbira nawini. Ani bialu yári ogoni agali maru karume bulene nawiore. Mana wiaabo halu Arono ibunibi ibu igini aguanerumebi tigua dege karulolebira. 14Horo bibahendengi Arono ibunaga biabe loma irame dai helonaga loma bu delolene egerebagi alendobi delalu haabo haga hene.15Arono ibu agali loma binigo mo miaga helonaga ibunaga haguaneni weli taraore mbirame odo wini. Anduane Homogohanda ogonidagua bialu Arono halu ibu damene mani holebirarubi ti baba habo nalolene bi lo wialu habo nalolene bi ogoni ibu habo nalole dahuliya andaga ngadagua wiaabo holebira. Ainde Anduane Homogohondo bi lolebi loma binigo mo miaga agalinaga biabe bulene ngago bulebi Anduane Homogonaga minini howa wali agali mo bayale helo lalu bi lolebi bibahende Arono ibugua dege haru bamba howa bialu holene wini. d 16Mosesehanda agali maru bu hearu helowa Arono ibu hangume lomarubi ira hagua nga bilo loma bu delolenebi Anduane Homogonaga loma bu delole yalu pugu bilo dabene. Anidagua biragola Anduane Homogohanda ibunaga wali agalime ko bini ngaru embeda halu wahai holebira. 17Ani bialu Mosese ibugua Aronohondo lamialu lalu wali agalinaga godi hale howa haru holene hongo mialu Yagaba hameigini bu karu Anduane Homogonaga bi mana lawai halu mana lo wini ngago baya hangu lawai halu mo wála halu helo mini.
18Ani heagola ainde agali maru Datanabi Abiramabi ti damene bu hearubi Kora halu ibu damene bu hearubi tigua ibalu Aronohondo keba timbuni halu hene. Dindi ko iba dalu naibaga wiagoria howa tigua Arononaga biabe biyago dimagoli halu hene. Ani howa tigua bi mbiraore halu Arono bope hole manda bialu hene. e 19Anduane Homogohanda tigua uruni bialu heago hondowa ibu turu nahe hene. Ibugua ti baba keba timbuniore halu bibahende bo hilo wahai hene. Ibugua tara nahendeneale bialu agali uruni ira timbunime bo heda hai hene. 20Ani bialu Anduane Homogohanda Arononaga mini mo yaraga howa mo timbuniore halu ibugua mana mbira ogodagua ngelene. Wali agali bibahendeme tomo hengedaru aria bayale kago Arono aria karu bu mialu bibahendengi mberedi dewaore hiru yu íbuwa Arono aria karu nelo mialu halimu lene. 21Anduane Homogohanda mana ogoni Arono halu ibu igini bu hearu biamogo bialu wali agalime tinaga loma Anduane Homogonaga yalu ibirago ti nelonaga wabini. 22Anigo Arono aria ti dindi hobane mbira Isaraele hameigini maru ti tuwu ta hayadagua ti nawi howa ti dindi hobane mbirago aba ndo hene. Anduane Homogo ibuni tinaga abaore howa ibuni tinaga dindiore wiradagua bialu ibugua ti handaya ho hene. f
Piniasa henego ogo
23Agali mini lene timbuni tebone Eliasa igini Piniasa hene. Ibuore Anduane Homogonaga bi hale hole turuore halu ibu mana bayale ngago baya hangu taluwa bialu haabo haga hene. Wali agali tigua Anduane Homogo erembira mialu poragola Piniasa ibu hongo howa haabo haga hene. Anidagua biragome Anduane Homogohanda Isaraele wali agali lone dara ho dai biaga hene. g 24Anidagua bialu heagola Anduane Homogohanda ibunaga nenege agali bayale Piniasala haabo nalolene bi lo wialu ibugua mbirale loma bu mulene andaha ngaru bibahende baya hangu handaya ho halu wali agali haru bamba helo helene. Ani bialu agali loma binigo mo miaga haguane helo dabo helalu ibu igini aguaneru hangume loma binigo mo miaga haabo helo lalu lo wini. 25Anduane Homogohanda Yuda hameigini hearu aria Yasi igini Debidila habo nalolene bi lo wialu Yudanaga kini Debidi halu ibu damene degeme kini haabo holebira lalu lamini. Anidagua dege agali loma binigo mo miaga Arono igini aguaneneru tigua hanguore haabo holene wini.26Tígua wali agali baya hanguore mo tiga bialu haru halimulonaga Anduane Homogohanda mini bayale tíhondo talebu ngilonaga i̱na Anduane Homogohondo bi la haro. Anidagua bialu tínaga holene bayale ngago ereba nahelobi tínaga mini bayale mini lene timbuni ngemigo ani wiaabo helobi i̱na bi laharogoni.
Copyright information for
HUI